വാക്സിൻ
ഒരു നിശ്ചിത രോഗത്തിനെതിരേ ശരീരത്തിന്റെ പ്രതിരോധശേഷി വർദ്ധിപ്പിക്കുന്ന ജീവക്കൂട്ടിനെയാണ് വാക്സിൻ എന്നു പറയുന്നത്. രോഗാണുക്കളെ നശിപ്പിക്കാൻ രോഗാണുക്കളെ തന്നെ ഉപയോഗിക്കുക എന്നതാണ് വാക്സിനേഷന്റെ തത്ത്വം. രോഗാണുക്കൾക്കെതിരെ പ്രവർത്തിക്കാൻ ശേഷിയുള്ള ശ്വേത രക്താണുക്കളെ നേരത്തെ സജ്ജമാക്കുകയാണ് വാക്സിനേഷനിൽ ചെയ്യുന്നത്. ആന്റിജനുകളുടെ സാന്നിധ്യം മനസ്സിലാക്കി അവയ്ക്കെതിരെ ഉത്തേജിതമാകുവാൻ ലിംഫോസൈറ്റുകൾക്ക് കഴിവുണ്ട്. ജീവനുള്ളവയും ഇല്ലാത്തവയുമായ രോഗാണുക്കളെ വാക്സിനുകളായി ഉപയോഗപ്പെടുത്തുന്നുണ്ട്. പേപ്പട്ടി വിഷബാധയ്കെതിരെയുള്ള റാബിസ് വാക്സിനുകൾ, പോളിയോ രോഗത്തിനതിരെയുള്ള സാൽക്ക് വാക്സിനുകൾ എന്നിവയിൽ മൃതങ്ങളായ അണുക്കളെയാണ് ഉപയോഗിക്കുന്നത്. ക്ഷയരോഗത്തിനെതിരെയുള്ള ബി.സി.ജി കുത്തിവയ്പിന് ജീവനുള്ളതും നിർവീര്യമാക്കപ്പെട്ടതുമായ രോഗാണക്കളെ ഉപയോഗിക്കുന്നു. വസൂരി രോഗബാധയ്കെതിരെ സജീവമായ ഗോവസൂരി രോഗാണുക്കളെയാണ് ഉപയോഗിച്ചിരുന്നത്. ചില വാക്സിനുകളിൽ രോഗാണുക്കൾ ഉൽപാദിപ്പിക്കുന്ന ടോക്സിനുകൾ നിർവീര്യമാക്കിയാണ് ഉപയോഗിക്കുന്നത്.
കൊറോണവൈറസ് രോഗം 2019 വാക്സിൻ
പതിനാറ് COVID-19 വാക്‌സിനുകൾക്ക് ദേശീയ റെഗുലേറ്ററി അധികൃതർ അടിയന്തര ഉപയോഗത്തിനുള്ള അനുമതി നൽകി. അവയിൽ ആറെണ്ണം കുറഞ്ഞത് ഒരു ലോകാരോഗ്യ സംഘടന അംഗീകരിച്ച കർശനമായ റെഗുലേറ്ററി അതോറിറ്റിയെങ്കിലും (ഓക്സ്ഫോർഡ്-അസ്ട്രാസെനെക്ക, ഫൈസർ-ബയോടെക്, സിനോഫാർം-ബിബിഐബിപി, മോഡേണ, സിനോവാക്, ജോൺസൺ & ജോൺസൺ) അടിയന്തിര അല്ലെങ്കിൽ പൂർണ്ണ ഉപയോഗത്തിനായി അംഗീകരിച്ചു.
നമുക്ക് വിവിധ കോവിഡ്-19 പ്രതിരോധ വാക്സിനുകൾ കുറിച്ച് അറിയാം
കോവാക്സിൻ
ഭാരത് ബയോടെക് ഇന്ത്യൻ കൌൺസിൽ ഓഫ് മെഡിക്കൽ റിസർച്ചുമായി ചേർന്ന് വികസിപ്പിച്ച നിർജ്ജീവ വാക്സിൻ തരത്തിലുള്ള കോവിഡ്-19 വാക്സിൻ ആണ് കോവാക്സിൻ (BBV152).
നിർജ്ജീവ വാക്സിൻ എന്ന നിലയിൽ ബിബിഐബിപി-കോർ‌വ്, കൊറോണവാക് എന്നിവയിൽ എന്ന പോലെ, നിഷ്ക്രിയമാക്കിയ പോളിയോ വാക്സിന് സമാനമായ കൂടുതൽ പരമ്പരാഗത സാങ്കേതികവിദ്യയാണ് കോവാക്സിൻ നിർമ്മിക്കാൻ ഉപയോഗിക്കുന്നത്. തുടക്കത്തിൽ, SARS-CoV-2 ന്റെ ഒരു സാമ്പിൾ ഇന്ത്യയുടെ നാഷണൽ ഇൻസ്റ്റിറ്റ്യൂട്ട് ഓഫ് വൈറോളജി വേർതിരിച്ചെടുക്കുകയും, വെറോ സെല്ലുകൾ ഉപയോഗിച്ച് വലിയ അളവിൽ വൈറസ് വളർത്താൻ ഉപയോഗിക്കുകയും ചെയ്തു. അന്നുമുതൽ, വൈറസുകൾ ബീറ്റാ പ്രോപിയോളാക്റ്റോണിൽ ഇട്ട് നിർജ്ജീവമാക്കുന്നു. തത്ഫലമായുണ്ടാകുന്ന നിർജ്ജീവ വൈറസുകൾ പിന്നീട് അലുമിനിയം അധിഷ്ഠിത അഡ്ജുവന്റുമായി കലർത്തുന്നു.[1]
300 ദശലക്ഷം ഡോസുകൾ നിർമ്മിക്കാൻ ശേഷിയുള്ള ഭാരത് ബയോടെക്കിന്റെ ഇൻ- ഹൌസ് വെറോ സെൽ നിർമ്മാണ പ്ലാറ്റ്ഫോമിൽ ആണ് ഇത് നിർമ്മിക്കുന്നത്.കോവാക്സിൻ നിർമ്മിക്കുന്നതിനായി ഹൈദരാബാദിലെ ജീനോം വാലി കേന്ദ്രത്തിൽ രണ്ടാമത്തെ പ്ലാന്റ് സ്ഥാപിക്കാനുള്ള ഒരുക്കത്തിലാണ് കമ്പനി. വാക്സിൻ ഉണ്ടാക്കുവാൻ രാജ്യത്തെ മറ്റൊരു സൈറ്റ് വേണ്ടി ഒഡീഷ പോലുള്ള മറ്റ് സംസ്ഥാന സർക്കാരുകളുമായും ചർച്ചയിൽ ആണ്.ഇതിനുപുറമെ, കോവാക്സിൻ നിർമ്മാണത്തിനായുള്ള ആഗോള ബന്ധങ്ങളും അവർ പരിശോധിക്കുന്നു.
യുഎസ് വിപണിയിൽ കോവാക്സിൻ വികസിപ്പിക്കുന്നതിനായി 2020 ഡിസംബറിൽ ഒകുജെൻ ഭാരത് ബയോടെക്കുമായി ഒരു പങ്കാളിത്ത കരാറിൽ ഏർപ്പെട്ടു. 2021 ജനുവരിയിൽ ബ്രസീലിൽ കോവാക്സിൻ വിതരണം ചെയ്യുന്നതിനായി പ്രസിസ മെഡ് ഭാരത് ബയോടെക്കുമായി കരാർ ഒപ്പിട്ടു.
ഭാരത് ബയോടെക്കിന് പുറമേ ഇന്ത്യയിൽ വാക്സിൻ ഉത്പാദിപ്പിക്കുന്നതിനായി 2021 ഏപ്രിലിൽ ഹാഫ്കൈൻ ഇൻസ്റ്റിറ്റ്യൂട്ട് ഐസിഎംആറിൽ നിന്ന് സാങ്കേതിക കൈമാറ്റം വഴി ഉൽപ്പാദന അവകാശങ്ങൾ നേടി. ഇന്ത്യൻ ഇമ്മ്യൂണോളജിക്കൽ ലിമിറ്റഡും (ഐഐഎൽ) 2021 ജൂലൈ -ഓഗസ്റ്റ് മുതൽ വാക്സിൻ പുറത്തിറക്കാൻ തുടങ്ങുമെന്ന് സ്ഥിരീകരിച്ചു.
ജോൺസൺ & ജോൺസൺ കോവിഡ്-19 വാക്സിൻ
ഒരു കോവിഡ് -19 വാക്സിനാണ് ജോൺസൺ & ജോൺസൺ കോവിഡ് -19 വാക്സിൻ. ഇത് വികസിപ്പിച്ചെടുത്തത് നെതർലാൻഡിലെ ലൈഡനിലെ ജാൻസെൻ വാക്സിൻസും ബെൽജിയൻ പാരന്റ് കമ്പനിയായ ജാൻസെൻ ഫാർമസ്യൂട്ടിക്കൽസും, അമേരിക്കൻ കമ്പനിയായ ജോൺസൺ & ജോൺസന്റെയും അനുബന്ധ സ്ഥാപനവുമാണ്.
COVID-19 ന് കാരണമാകുന്ന SARS-CoV-2 വൈറസിന്റെ സ്പൈക്ക് പ്രോട്ടീൻ നിർമ്മിക്കുന്നതിനുള്ള ജീൻ അടങ്ങിയിരിക്കുന്ന രീതിയിൽ പരിഷ്കരിച്ച മനുഷ്യ അഡിനോവൈറസിനെ അടിസ്ഥാനമാക്കിയുള്ള ഒരു വൈറൽ വെക്റ്റർ വാക്സിനാണിത്.ശരീരത്തിന്റെ രോഗപ്രതിരോധവ്യവസ്ഥ ആന്റിബോഡികൾ ഉൽ‌പാദിപ്പിക്കുന്നതിന് ഈ സ്പൈക്ക് പ്രോട്ടീനോട് പ്രതികരിക്കുന്നു. വാക്സിൻ ഒരു ഡോസ് മാത്രമേ ആവശ്യമുള്ളൂ. അത് ഫ്രീസുചെയ്ത് സൂക്ഷിക്കേണ്ടതില്ല.
വാക്‌സിനുള്ള ക്ലിനിക്കൽ പരീക്ഷണങ്ങൾ 2020 ജൂണിൽ ആരംഭിച്ചു. മൂന്നാം ഘട്ട പരീക്ഷണങ്ങളിൽ 43,000 പേർ പങ്കെടുത്തു. വാക്സിനേഷൻ പൂർത്തിയാക്കി 28 ദിവസത്തിനുശേഷം വാക്സിനേഷൻ ഒരു ഡോസ് വ്യവസ്ഥയിൽ 66% ഫലപ്രദമാണെന്നും രോഗലക്ഷണമായ COVID-19 തടയുന്നതിൽ 85% ഫലപ്രാപ്തിയും കടുത്ത COVID-19 തടയുന്നതിൽ 85% ഫലപ്രാപ്തിയും ആശുപത്രിയിൽ പ്രവേശിക്കുന്നതിനോ അല്ലെങ്കിൽ രോഗം മൂലമുണ്ടാകുന്ന മരണത്തെയോ തടയുന്നതിൽ 100% ഫലപ്രാപ്തിയും ഉണ്ടെന്ന് 2021 ജനുവരി 29 ന് ജാൻസെൻ പ്രഖ്യാപിച്ചു.
വാക്സിന് യുഎസ് ഫുഡ് ആൻഡ് ഡ്രഗ് അഡ്മിനിസ്ട്രേഷൻ അടിയന്തിര ഉപയോഗ അംഗീകാരവും യൂറോപ്യൻ മെഡിസിൻസ് ഏജൻസി (ഇഎംഎ) യുടെ സോപാധികമായ മാർക്കറ്റിംഗ് അംഗീകാരവും നൽകി.
കോവിഷീൽഡ് വാക്സിൻ
ഓക്സ്ഫോർഡ് സർവ്വകലാശാലയും ഇംഗ്ലണ്ടിലെ ആസ്ട്രാസെനെക്ക ബഹുരാഷ്ട്ര മരുന്നുകമ്പനിയും ചേർന്ന് വികസിപ്പിച്ചെടുത്ത കോവിഡ്-19 വാക്സിനാണ് കോവിഷീൽഡ് (AZD1222). ഇത് ഓക്സ്ഫോർഡ്- ആസ്ട്രാസെനെക്ക വാക്സിൻ എന്നും അറിയപ്പെടുന്നു. ചിമ്പാൻസികളിൽ കാണപ്പെടുന്ന അഡിനോവൈറസ് ChAdOx1 എന്ന ഇനത്തെ രൂപഭേദം വരുത്തി, വാഹകരായി ഉപയോഗിച്ചാണ് ഈ വാക്സിൻ നിർമ്മിച്ചിരിക്കുന്നത്. പേശികളിലേയ്ക്ക് നേരിട്ട് കുത്തിവയ്ക്കുന്ന വാക്സിനാണിത്. ഡിസംബർ 2020 ൽ വാക്സിൻ പരീക്ഷണങ്ങളുടെ മൂന്നാം ഘട്ട ട്രയൽ നടന്നു. 2020 ഡിസംബറിൽ അമേരിക്ക വാക്സിനേഷൻ പദ്ധതി ഈ വാക്സിനെ ഔദ്യോഗികമായി അംഗീകരിച്ചു. 2021 ജനുവരി 4 ന് ആദ്യമായി വാക്സിൻ മനുഷ്യരിൽ ചികിത്സാർത്ഥം പ്രയോഗിച്ചു.
ചിമ്പാൻസിയിൽ നിന്നെടുത്ത രൂപഭേദം വരുത്തിയ അഡിനോവൈറസിന് മനുഷ്യശരീരത്തിൽ പെരുകാനുള്ള ശേഷിയില്ല. അതിനാൽ അവ മനുഷ്യരിൽ രോഗമുണ്ടാക്കില്ല. ഈ വൈറസ് കോവിഡ് -19 രോഗത്തിന് കാരണമാകുന്ന സാർസ്-കോവി-2 വൈറസിന്റെ പ്രോട്ടീൻ കവചത്തിലെ സ്പൈക്ക് പ്രോട്ടീനുകളെ മനുഷ്യശരീരത്തിലെത്തിക്കുന്ന വാഹകരായി പ്രവർത്തിക്കുന്നു. വാക്സിൻ 2-8 ഡിഗ്രി സെൽഷ്യസിലാണ് സൂക്ഷിക്കേണ്ടത്. വാക്സിന്റെ ഒരു ഡോസിന് 3 മുതൽ 4 വരെ ഡോളറാണ് വില. പ്രതിമാസം 100 ദശലക്ഷം മുതൽ 200 ദശലക്ഷം വരെ ഡോസുകൾ ഉത്പാദിപ്പിക്കാനാകും.
മനുഷ്യകോശോപരിതലത്തിലെ ആൻജിയോടെൻസിൻ കൺവേർട്ടിംഗ് എൻസൈം-2 എന്ന സ്വീകരണികളിലേയ്ക്ക് കോവിഡ് 19 വൈറസിൻറെ ഉപരിതലത്തിലുള്ള സ്പൈക്ക് എസ്-1 പ്രോട്ടീൻ ബന്ധിക്കുമ്പോഴാണ് കോശത്തിലേയ്ക്ക് വൈറസ് പ്രവേശിച്ച് രോഗബാധയുണ്ടാകുന്നത്. വാക്സിനിലുള്ള ചിമ്പാൻസിയിലെ അഡിനോനോവൈറസിന് മനുഷ്യശരീരത്തിൽ പെരുകാനുള്ള ശേഷിയില്ല. എന്നാൽ അതിൽ കോവിഡ്-19 വൈറസിലെ സ്പൈക് പ്രോട്ടീനിനെ ഉത്പാദിപ്പിക്കാനുള്ള ജനിതകവസ്തുവുണ്ട്. ശരീരത്തിലെത്തിയാൽ ഈ അഡിനോവൈറസ് അതിലുൾച്ചേർത്ത ജനിതകവസ്തു ഉപയോഗിച്ച് കോവിഡ്-19 വൈറസിലുള്ളതുപോലെ സ്പൈക്ക് പ്രോട്ടീനിനെ ഉത്പാദിപ്പിക്കും. ഈ സ്പൈക് പ്രോട്ടീനിനെതിരെ ദിവസങ്ങൾക്കകം ശരീരത്തിന്റെ സ്വാഭാവിക രോഗപ്രതിരോധശേഷി പ്രതിദ്രവ്യങ്ങളെ (ആന്റിബോഡികൾ) രൂപപ്പെടുത്തി നശിപ്പിക്കുകയും ആന്റിബോഡികൾ ശരീരത്തിൽ നിലനിൽക്കുകയും ചെയ്യും. പിന്നീട് എപ്പോഴെങ്കിലും രോഗകാരിയായ കോവിഡ്-19 വൈറസ് ശരീരത്തിലെത്തിയാൽ അവയുടെ പ്രതലത്തിലുള്ള സ്പൈക്ക് പ്രോട്ടീനിനെ ഈ ആന്റിബോഡികൾ തിരിച്ചറിഞ്ഞ് ഉടനേതന്നെ നശിപ്പിക്കുന്നതിലൂടെ രോഗബാധ തടയും.
സ്പുട്നിക് V കോവിഡ് വാക്സിൻ
ഗമാലേയ റിസർച്ച് ഇൻസ്റ്റിറ്റ്യൂട്ട് ഓഫ് എപ്പിഡെമിയോളജി ആൻഡ് മൈക്രോബയോളജി വികസിപ്പിച്ചെടുത്ത കോവിഡ്-19 നുള്ള വൈറൽ വെക്റ്റർ വാക്സിനാണ് സ്പുട്നിക് വി. റഷ്യൻ ആരോഗ്യ മന്ത്രാലയം 2020 ഓഗസ്റ്റ് 11 ന് ഗാം-കോവിഡ്-വാക് എന്ന പേരിൽ രജിസ്റ്റർ ചെയ്തത് സ്പുട്നിക് വി ഒരു അഡെനോവൈറസ് വൈറൽ വെക്റ്റർ വാക്സിനാണ്. “V” എന്നത് ഇംഗ്ലീഷ് അക്ഷരമാലയുടെ അക്ഷരത്തെ സൂചിപ്പിക്കുന്നു, അല്ലാതെ റോമൻ അക്കമായ അഞ്ച് നെ അല്ല.
ഗാം-കോവിഡ്-വാക്സിനു തുടക്കത്തിൽ റഷ്യയിലും പിന്നീട് മറ്റ് 59 രാജ്യങ്ങളിലും ആണ് (ഏപ്രിൽ 2021 ലെ കണക്കനുസരിച്ച്) വിതരാണാനുമതി ലഭിച്ചിരുന്നത്. ഘട്ടം I-II പഠനങ്ങളുടെ പ്രാഥമിക ഫലങ്ങൾ 2020 സെപ്റ്റംബർ 4 ന് പ്രസിദ്ധീകരിച്ചു. ഗാം-കോവിഡ്-വാക്സിന് വളരെ പെട്ടെന്ന് തന്നെ ഉപയോഗയോഗ്യമാണെന്ന് അനുമതി നൽകിയത് സമൂഹമാധ്യമങ്ങളിലും മാധ്യമങ്ങളിലും വിമർശനത്തിനിടയാക്കി. ഇത് ശാസ്ത്ര സമൂഹത്തിലും വലിയ ചർച്ചകൾക്ക് വിധേയമായി. വാക്സിന്റെ സുരക്ഷയും ഫലപ്രാപ്തിയും സ്ഥിരീകരിക്കുന്ന ശക്തമായ ശാസ്ത്രീയ ഗവേഷണത്തിന്റെ അഭാവത്തിൽ ഈ അംഗീകാരം ന്യായമാണോ എന്ന് ചർച്ചകൾ ഉയർന്നു. 2021 ഫെബ്രുവരി 2 ന്, പരീക്ഷണങ്ങളിൽ നിന്നുള്ള ഒരു ഇടക്കാല വിശകലനം ദി ലാൻസെറ്റിൽ പ്രസിദ്ധീകരിച്ചു. ഇത് വാക്സിന് അസാധാരണമായ പാർശ്വഫലങ്ങളില്ലാതെ 91.6% ഫലപ്രാപ്തി ഉണ്ടെന്ന് സൂചിപ്പിച്ചുകൊണ്ടുള്ള ഒന്നായിരുന്നു.
റഷ്യ, അർജന്റീന, ബെലാറസ്, ഹംഗറി, സെർബിയ, ഐക്യ അറബ് എമിറേറ്റ്സ് തുടങ്ങിയ രാജ്യങ്ങളിൽ 2020 ഡിസംബറിൽ വാക്സിൻ അടിയന്തരമായി വിതരണം ആരംഭിച്ചു. 2021 ഫെബ്രുവരി ആയപ്പോഴേക്കും നൂറു കോടി ഡോസ് വാക്സിൻ ആഗോളതലത്തിൽ ഉടനടി വിതരണം ചെയ്യാൻ ഉത്തരവിട്ടിരുന്നു.
ഫൈസർ-ബയോഎൻടെക് കോവിഡ്-19 വാക്സിൻ
കോമിർനാട്ടി എന്ന ബ്രാൻഡിൽ വിൽക്കപ്പെടുന്ന, എംആർഎൻഎ അടിസ്ഥാനമാക്കിയുള്ള കോവിഡ് -19 വാക്സിൻ ആണ് ഫൈസർ-ബയോഎൻടെക് കോവിഡ്-19 വാക്സിൻ. COVID-19 ന് കാരണമാകുന്ന SARS-CoV-2 വൈറസ് അണുബാധയിൽ നിന്ന് സംരക്ഷണം നൽകുന്നതിന് 16 വയസും അതിൽ കൂടുതലുമുള്ള ആളുകളിൽ ഇത് ഉപയോഗിക്കുന്നു. ജർമ്മൻ കമ്പനിയായ ബയോ എൻ‌ടെക് വാക്സിൻ വികസിപ്പിച്ചെടുത്ത ഈ വാക്സിനിൻ്റെ ക്ലിനിക്കൽ പരീക്ഷണങ്ങൾ, ലോജിസ്റ്റിക്സ്, നിർമാണം എന്നിവ അമേരിക്കൻ കമ്പനിയായ ഫൈസറാണ് നടത്തുന്നത്. എന്നാൽചൈനയിൽ ബയോ എൻ‌ടെക് ചൈന ആസ്ഥാനമായുള്ള ഫൊസുന് ഫാർമയാണ് ഈ വാക്സിനിൻ്റെ വികസനം, മാർക്കറ്റിംഗ്, വിതരണം എന്നിവ നടത്തുന്നത്. അതിനാൽ തന്നെ ചൈനയിൽ ഇത് ഫൊസുന്-ബയോ എൻ‌ടെക് കോവിഡ്-19 വാക്സിൻ എന്നാണറിതയപ്പെടുന്നത്.
ഇൻട്രാമസ്കുലർ കുത്തിവയ്പ്പാണ് ഇത് നൽകുന്നത്. ന്യൂക്ലിയോസൈഡ് പരിഷ്കരിച്ച എംആർഎൻഎ (മോഡ് ആർ‌എൻ‌എ) ഉൾക്കൊള്ളുന്നതാണ് ഇത്, SARS-CoV-2 ന്റെ മുഴുനീള സ്പൈക്ക് പ്രോട്ടീന്റെ പരിവർത്തനം ചെയ്ത രൂപമായ, ഇത് ലിപിഡ് നാനോപാർട്ടിക്കിളുകൾ ആയാണ് ശരീരത്തിൽ കുത്തിവയ്ക്കുന്നത്. മൂന്നാഴ്ച ഇടവേളയിൽ രണ്ട് ഡോസുകൾ ആയാണ് ഇത് കുത്തിവയ്ക്കപ്പെടുന്നത്.
2021 മാർച്ച് 30 ലെ കണക്കനുസരിച്ച് 2021ഇൽ 250 കോടിയോളം ഉൽ‌പ്പാദനം നടത്താൻ ഫൈസറും ബയോ‌ടെക്കും ലക്ഷ്യമിടുന്നു. ഈ വാക്സിന്റെ വിതരണവും സംഭരണവും ഒരു ലോജിസ്റ്റിക് വെല്ലുവിളിയാണ്, കാരണം ഇത് വളരെ കുറഞ്ഞ താപനിലയിൽ സൂക്ഷിക്കേണ്ടതുണ്ട്. ഇത്തരം അൾട്രാകോൾഡ് സംഭരണം ആവശ്യമില്ലാത്ത തരം വാക്സിനുകളുടെ സാധ്യതകൾ ഫൈസർ പരിശോധിക്കുന്നുണ്ട്.
മോഡേണ കോവിഡ് ‑ 19 വാക്സിൻ
മോഡേണ, യുണൈറ്റഡ് സ്റ്റേറ്റ്സ് നാഷണൽ ഇൻസ്റ്റിറ്റ്യൂട്ട് ഓഫ് അലർജി ആൻഡ് ഇൻഫെക്റ്റിയസ് ഡിസീസസ് (NIAID), ബയോമെഡിക്കൽ അഡ്വാൻസ്ഡ് റിസർച്ച് ആൻഡ് ഡവലപ്മെൻറ് അതോറിറ്റി (BARDA) എന്നിവ വികസിപ്പിച്ചെടുത്ത കോവിഡ് -19 വാക്സിനാണ് എംആർഎൻഎ -1273 എന്ന രഹസ്യനാമമുള്ള മോഡേണ കോവിഡ് ‑ 19 വാക്സിൻ. കൊറോണ വൈറസ് രോഗം 2019 ന് കാരണമാകുന്ന SARS-CoV-2 വൈറസ് അണുബാധയിൽ നിന്ന് സംരക്ഷണം നൽകാൻ 18 വയസും അതിൽ കൂടുതലുമുള്ള ആളുകളിൽ ഇത് ഉപയോഗിക്കുന്നു. നാല് ആഴ്ച ഇടവേളയിൽ 0.5 മില്ലി വീതമുള്ള രണ്ട് ഡോസുകളായി ഇൻട്രാമസ്കുലർ കുത്തിവയ്പ്പ് നൽകുന്ന രീതിയിലാണ് ഇത് രൂപകൽപ്പന ചെയ്തിട്ടുള്ളത്.
അമേരിക്ക, യൂറോപ്യൻ യൂണിയൻ, യുണൈറ്റഡ് കിംഗ്ഡം, ഇസ്രായേൽ, സിംഗപ്പൂർ എന്നിവയുൾപ്പെടെ 45 രാജ്യങ്ങളിൽ മോഡേണ കോവിഡ് -19 വാക്സിൻ ചില തലങ്ങളിൽ ഉപയോഗിക്കാൻ അധികാരപ്പെടുത്തിയിട്ടുണ്ട്. 2021 മാർച്ച് 15 ന് മോഡേണയുടെ രണ്ടാമത്തെ കോവിഡ്-19 വാക്സിന്റെ ( ‘mRNA-1283’ ) ആദ്യ ക്ലിനിക്കൽ പരീക്ഷണങ്ങൾ ആരംഭിച്ചു
അവലംബം :- വിക്കി പീഡിയ