മലയാള സിനിമ ലോകം ഇതുവരെ പരീക്ഷിക്കാത്ത തരത്തിലുള്ള ഒരു ചിത്രമാണ് മഹാവീര്യർ. വ്യത്യസ്തമായ ഒരു ചിത്രമെന്ന് ഇതിനെ നമ്മുക്ക് വിശേഷിപ്പിക്കാൻ സാധിക്കും. നർമ്മവും ഫാന്റസിയും ടൈം ട്രാവലും എല്ലാമുൾപ്പെടുത്തി രണ്ടു കാലഘട്ടങ്ങളിലൂടെ കഥ പറയുന്ന ചിത്രമാണിത്. നിവിൻ പോളി സ്വാമി അപൂർണാനന്തൻ എന്ന കഥാപാത്രത്തെ അനുഭവേദ്യമാക്കിയപ്പോൾ , വീരഭദ്രൻ എന്ന കഥാപാത്രമായാണ് ആസിഫ് അലി എത്തുന്നത്. വിഗ്രഹമോഷണത്തിന്റെ പേരിൽ കുറ്റാരോപണം നേരിട്ട അപൂർണാനന്ത സ്വാമി കോടതിയിലെത്തുകയും തന്റെ കേസ് സ്വയം വാദിക്കുകയും ചെയ്യുന്നു . അതിനു മുമ്പ് തന്നെ നൂറ്റാണ്ടുകൾ മുമ്പ് നാട് ഭരിച്ച ഉഗ്രസേന മഹാരാജാവിനെയും, അദ്ദേഹത്തിന് വേണ്ടി രാജ്യത്തെ ഏറ്റവും ലക്ഷണയുക്തയായ പെണ്കുട്ടിയെ തേടി പോകുന്ന മന്ത്രി വീരഭദ്രനെയും പ്രേക്ഷകർക്ക് മുന്നിൽ സംവിധായകൻ അവതരിപ്പിക്കുന്നുണ്ട്.