മസ്കറ്റ് : സുൽത്താനേറ്റിലെ തങ്ങളുടെ സാന്നിധ്യം കൂടുതൽ വിപുലീകരിക്കുന്നതിന്റെ ഭാഗമായി മേഖലയിലെ പ്രമുഖ റീട്ടെയിലർമാരായ ലുലു ഗ്രൂപ്പ് തങ്ങളുടെ ഏറ്റവും പുതിയ റീട്ടെയിൽ ഡെസ്റ്റിനേഷൻ ഒമാനിൽ അൽ അൻസാബിൽ തുറന്നു. ഒമാനിലെ മുപ്പതാമത് റീറ്റെയ്ൽ ഔട്ട്ലെറ്റ് ആണ് അൽ അൻസാബിൽ ആരംഭിച്ചത്. ഒമാൻ ചേംബർ ഓഫ് കൊമേഴ്‌സ് ആൻഡ് ഇൻഡസ്ട്രി ചെയർമാൻ ഷെയ്ഖ് ഫൈസൽ അബ്ദുല്ല അൽ റവാസ് സ്ഥാപനം ഉൽഘാടനം ചെയ്തു.ഒമാനിലെ ഇന്ത്യൻ സ്ഥാനപതി അമിത് നാരംഗ്, റോയൽ ഒമാൻ പോലീസ് സാമ്പത്തിക കാര്യ ഡയറക്ടർ ജനറൽ ജമാൽ സയീദ് അൽ തായ്, റോയൽ ഒമാൻ പൊലീസിലെ ഉന്നത ഉദ്യോഗസ്ഥർ, ലുലു ഗ്രൂപ്പ് ചെയർമാൻ എം എ യൂസഫലി തുടങ്ങിയ പ്രമുഖരുടെ സാന്നിധ്യത്തിലായിരുന്നു ഉൽഘാടനം.
നിക്ഷേപകർക്ക് ആകർഷകമായ ലക്ഷ്യസ്ഥാനമായി മാറാനുള്ള ഒമാൻ്റെ പ്രതിബദ്ധതയും അതിൻ്റെ അനുകൂലമായ ബിസിനസ് അന്തരീക്ഷവും ഷെയ്ഖ് ഫൈസൽ അബ്ദുല്ല അൽ റവാസ് ഉദ്ഘാടന ചടങ്ങിൽ ഊന്നിപ്പറഞ്ഞു. രാജ്യത്ത് നിക്ഷേപം നടത്താനും അഭിവൃദ്ധിപ്പെടാനും ലുലു പോലുള്ള വൻകിട പദ്ധതികളെ സർക്കാരിൻ്റെ നയങ്ങൾ സജീവമായി പ്രോത്സാഹിപ്പിക്കുകയും സ്വാഗതം ചെയ്യുകയും ചെയ്യുന്നു. ചടങ്ങിൽ അൽ ഘോർഫ മാഗസിൻ്റെ ഏറ്റവും പുതിയ പതിപ്പിൻ്റെ ഒരു കോപ്പി ഷെയ്ഖ് ഫൈസൽ എം എ യൂസഫ് അലിക്ക് സമ്മാനിച്ചു.150,000 ചതുരശ്ര അടിയിൽ പരന്നുകിടക്കുന്ന ഏറ്റവും പുതിയ ഷോപ്പിംഗ് സമുച്ചയം , അൽ അൻസാബിലെയും പരിസര പ്രദേശങ്ങളിലെയും പൗരന്മാർക്കും താമസക്കാർക്കും സമ്പന്നമായ ഷോപ്പിംഗ് അനുഭവം പ്രദാനം ചെയ്യുന്ന ഒന്നാണ്. ആരോഗ്യകരവും ഭക്ഷണക്രമത്തിലുള്ളതുമായ ഭക്ഷണം തെരഞ്ഞെടുക്കാനുള്ള സ്വാതന്ത്ര്യം, ‘ഫ്രീ ഫ്രം’ ഭക്ഷണങ്ങളുടെ വിപുലമായ ശ്രേണി, വളർത്തുമൃഗങ്ങളുടെ ഭക്ഷണങ്ങൾ, ഫ്രഷ് സുഷി, ഗ്രിൽ ചെയ്ത മത്സ്യം എന്നിവ ഉൾപ്പെടുന്ന സീ ഫുഡ് വിഭാഗം, പ്രീമിയം മാംസങ്ങൾ, വിപുലമായ ഇറക്കുമതി ഉൽപ്പന്ന ശ്രേണി എന്നിവയെല്ലാം ഹൈപ്പർമാർക്കറ്റിൻ്റെ പ്രത്യേക സവിശേഷതകളിൽ ഉൾപ്പെടുന്നു.
ഫ്രഷ് ജ്യൂസുകൾ മുതൽ ഫ്രഷ്-ബേക്ക് ചെയ്ത ബ്രെഡുകളും കേക്കുകളും ഉൾപ്പെടെ വിപുലമായ ഫ്രഷ് ഭക്ഷണ ശേഖരണം ഒരുക്കിയിട്ടുണ്ട്. ഏറ്റവും പുതിയ പഴങ്ങളുടെയും പച്ചക്കറികളുടെയും സെക്ഷനും ഒരുങ്ങിയിട്ടുണ്ട്. . ഏറ്റവും പുതിയ ഫാഷൻ, സൗന്ദര്യവർദ്ധക ഉൽപ്പന്നങ്ങൾ, ഇലക്ട്രോണിക്സ് & ഐടി ഉൽപ്പന്നങ്ങൾ, ഗൃഹോപകരണങ്ങൾ, സ്പോർട്സ്, ലഗേജ്, സ്റ്റേഷനറികൾ എന്നിവയും അതിലേറെയും ലുലു ഹൈപ്പർമാർക്കറ്റ് ഓഫറുകളിൽ ഉൾപ്പെടുന്നു.
ഒമാൻ്റെ ഭൂമികയിലേക്ക് മറ്റൊരു നാഴികക്കല്ല് കൂടി ചേർക്കുന്നതിൽ ലുലു ഗ്രൂപ്പിന് സന്തോഷമുണ്ടെന്നും ഈ അഭിമാനകരമായ പദ്ധതി കൈകാര്യം ചെയ്യാൻ ഞങ്ങളെ ഏൽപ്പിച്ചതിന് റോയൽ ഒമാൻ പോലീസിനും സർക്കാരിനും ഞങ്ങളുടെ ആത്മാർത്ഥമായ നന്ദി അറിയിക്കുന്നുവെന്നും പരിപാടിയിൽ സംസാരിച്ച എം എ യൂസഫ് അലി പറഞ്ഞു. ലുലു എന്ന ബ്രാൻഡ് എല്ലായ്‌പ്പോഴും നഗര കേന്ദ്രങ്ങളിൽ മാത്രമല്ല, ആളുകൾക്ക് ദീർഘദൂരം ഡ്രൈവ് ചെയ്യേണ്ട ആവശ്യമില്ലാതെ ഉൾ പ്രദേശങ്ങളിലും ഭക്ഷണ സാധനങ്ങൾ എത്തിച്ചുനല്കുന്നതിൽ ശ്രദ്ധാലുക്കളാണ്. ലോകോത്തര ഷോപ്പിംഗ് നൽകാൻ ഞങ്ങൾ പ്രതിജ്ഞാബദ്ധരാണ്, ഞങ്ങളുടെ അടിസ്ഥാന ഉപഭോഗതാക്കളുടെ ജീവിതശൈലി ആവശ്യങ്ങൾ നിറവേറ്റുന്നത് ഞങ്ങൾ തുടരുമെന്നും അദ്ദഹം പറഞ്ഞു.
സ്വദേശി തൊഴിലാളികൾക്ക് ആവശ്യമായ പരിശീലനവും തൊഴിൽ നൈപു ന്യം വർധിപ്പിക്കുന്നതിനുള്ള അവസരങ്ങളും നൽകുന്നതിന് ലക്ഷ്യമിട്ടുള്ള ഘടനാപരമായ റിക്രൂട്ട്‌മെൻ്റ് പ്രക്രിയയിലൂടെ സ്വദേശികൾക്കുള്ള തൊഴിലവസരങ്ങൾ പ്രോത്സാഹിപ്പിക്കുന്നതിലും പ്രദാനം ചെയ്യുന്നതിലും തങ്ങൾ ശ്രദ്ധ കേന്ദ്രീകരിച്ചിട്ടുണ്ടെന്നും യൂസഫ് അലി കൂട്ടിച്ചേർത്തു.
രാജ്യത്തെമ്പാടുമുള്ള ലുലുവിന്റെ എല്ലാ ഹൈപ്പർമാർക്കറ്റുകളിലുമായി 3,000-ലധികം ഒമാനി പൗരന്മാർ വിവിധ തസ്തികകളിൽ ജോലി ചെയ്യുന്നുണ്ട്. അവരിൽ പകുതിയോളം സ്ത്രീകളുമാണ്. 300 പൗരന്മാർക്ക് പാർട്ട് ടൈം ജോലി അവസരങ്ങളും നൽകിയിട്ടുണ്ട്. ഞങ്ങളുടെ തൊഴിലുകളിൽ കൂടുതൽ യുവാക്കളെ പ്രോത്സാഹിപ്പിക്കുകയും അതുവഴി കൂടുതൽ സാമ്പത്തിക പങ്കാളിത്തം ഉറപ്പാക്കുക യുമാണ് ലക്‌ഷ്യം.ലുലു ഗ്രൂപ്പിന്റെ സുൽത്താനേറ്റിലെ വിപുലീകരണ പദ്ധതിയുടെ ഭാഗമായി, “രണ്ടു വർഷത്തിനുള്ളിൽ നാല് പുതിയ ഹൈപ്പർമാർക്കറ്റുകൾ കൂടി തുറക്കും, ഇത് സ്വദേശി യുവാക്കൾക്ക് കൂടുതൽ തൊഴിൽ നൽകും. ഇതുകൂടാതെ, അടുത്ത വർഷത്തോടെ വരാനിരിക്കുന്ന ഖസായിൻ ഇക്കണോമിക് സിറ്റിയിൽ പഴങ്ങൾക്കും പച്ചക്കറികൾക്കുമുള്ള അത്യാധുനിക സൗകര്യവും സ്ഥാപിക്കുമെന്നും അദ്ദേഹം പറഞ്ഞു.
