ഒമാനിൽ ഇന്ത്യൻ സ്‌കൂൾസ് ബോർഡ് ഓഫ് ഡയറക്ടേഴ്‌സിന് കീഴിലെ ഇന്ത്യൻ സ്കൂളുകളിലേക്കുള്ള അടുത്ത അധ്യയന വർഷത്തെ പ്രവേശന നടപടികൾ അടുത്ത മാസം ഒന്നിന് ആരംഭിക്കും.
തലസ്ഥാനത്തെയും പരിസരങ്ങളിലെയും ഏഴ് ഇന്ത്യൻ സ്കൂളുകളിലേക്കുള്ള അഡ്മിഷനാണ് ഓൺലൈൻ രജിസ്‌ട്രേഷനിലൂടെ നടക്കുക. കെ ജി മുതൽ ഒമ്പതാം ക്ലാസ് വരെയുള്ള പ്രവേശനത്തിനാണ് ഓൺലൈൻ രജിസ്ട്രേഷൻ. അഡ്മിഷൻ നടപടികൾ പൂർണമായും ഓൺലൈനിലൂടെയാണ് നടക്കുന്നത്. രേഖകൾ സമർപ്പിക്കുന്നതിനോ ഫീസ് അടക്കുന്നതിനോ രക്ഷിതാക്കൾ സ്കൂൾ സന്ദർശിക്കേണ്ടതില്ല.
.indianschoolsoman.com എന്ന പോർട്ടലിലാണ് റജിസ്റ്റർ ചെയ്യേണ്ടത്. മസ്‌കത്ത്, ദാർസൈത്ത്, വാദി കബീർ, സീബ്, ഗുബ്ര, മബേല, ബൗഷർ ഇന്ത്യൻ സ്‌കൂളുകളിലേക്കാണ് ഓൺലൈൻ റജിസ്‌ട്രേഷൻ സൗകര്യമുള്ളത്.
2023 ഏപ്രിൽ ഒന്നിന് മൂന്നു വയസ് പൂർത്തിയായ കുട്ടികൾക്കായിരിക്കും കിന്റർഗാർട്ടൻ പ്രവേശനത്തിന് അർഹതയുണ്ടാകുക. റസിഡന്റ് വിസയുള്ള ഇന്ത്യക്കാരുടെ മക്കൾക്ക് പുറമെ മറ്റ് പ്രവാസി സമൂഹങ്ങളിലെയും കുട്ടികൾക്കും ഇത്തവണ പ്രവേശനം ലഭിക്കും. എന്നാൽ, ഇന്ത്യക്കാരല്ലാത്ത മറ്റ് പ്രവാസികളുടെ മക്കൾക്ക് സീറ്റ് ലഭ്യതക്കനുസരിച്ച് മാർച്ച് ആദ്യവാരം മുതലാകും സീറ്റ് നൽകുക.
പ്രത്യേക പരിഗണന ആവശ്യമുള്ള കുട്ടികൾക്കുള്ള പ്രവേശനം ഇന്ത്യൻ സ്കൂൾ മസ്‌കത്ത് പരിസരത്ത് സ്ഥിതി ചെയ്യുന്ന കെയർ ആൻഡ് സ്പെഷ്യൽ എജ്യുക്കേഷനിൽ (സി എസ് ഇ) ലഭ്യമാണ്. പ്രവേശനത്തിനായി www.cseoman.com വഴി അപേക്ഷിക്കാം.
