ഡെങ്കിപനി ലക്ഷണം ഉള്ളവരോട് ഉടൻ ചികിത്സ തേടണമെന്ന് ആരോഗ്യ മന്ത്രാലയം
ഡെങ്കിപ്പനിയുടെ ലക്ഷണങ്ങൾ കാണിക്കുന്നവരോട് ആരോഗ്യ കേന്ദ്രങ്ങൾ സന്ദർശിച്ച് നിർദ്ദേശിച്ച ചികിത്സകൾ പാലിക്കണമെന്ന് ഒമാൻ ആരോഗ്യ മന്ത്രാലയം ആവശ്യപ്പെട്ടു.
അൽ വുസ്ത ഗവർണറേറ്റ് ഒഴികെ ഒമാനിലെ വിവിധ ഗവർണറേറ്റുകളിൽ ഈഡിസ് കൊതുകിന്റെ സാന്നിധ്യമുണ്ടെന്ന് മന്ത്രാലയം ഉദ്യോഗസ്ഥൻ ആദിൽ സഈദ് വഹൈബി വിശദീകരിച്ചു.
മസ്‌കത്ത് ഗവർണറേറ്റിലെ മിക്ക വിലായത്തുകളിലും ഇത് കണ്ടെത്തിയിട്ടുണ്ടെന്നും ഇത് വൈറൽ പനിക്ക് കാരണമാകുമെന്നും, കൊതുക് രോഗബാധിതരിൽ നിന്ന് ആരോഗ്യമുള്ള വ്യക്തിയിലേക്ക് പകരുകയും ഡെങ്കിപ്പനി, മഞ്ഞപ്പനി, സിക്ക രോഗം, ചിക്കുൻഗുനിയ എന്നിവയിലേക്ക് നയിക്കുകയും ചെയ്യുന്നുവെന്നും അദ്ദേഹം കൂട്ടിച്ചേർത്തു. ,
ഇവയെല്ലാം അപകടകരമാണ്.
ഈഡിസ് കൊതുകുകളുടെ പ്രജനന കേന്ദ്രങ്ങളിൽ ഭൂരിഭാഗവും മനുഷ്യരോട് അടുത്ത് നിൽക്കുന്നതാണെന്ന് ചൂണ്ടിക്കാട്ടിയ അൽ-വഹൈബി, ഈഡിസ് കൊതുകിന്റെ പ്രജനന കേന്ദ്രങ്ങൾ ഇല്ലാതാക്കാൻ പൗരന്മാരും താമസക്കാരും യോജിച്ച് ശ്രമിച്ചാൽ ഈ കൊതുകിനെ തുരത്താൻ വളരെ എളുപ്പമാണെന്നും പറഞ്ഞു.
പക്ഷികൾക്കായി വെച്ചിരിക്കുന്ന വെള്ളം നിറച്ച ചെറിയ പാത്രങ്ങൾ, തുടർച്ചയായി വൃത്തിയാക്കാത്ത വലിയ പാത്രങ്ങൾ, കൊതുക് പെരുകുന്ന ഏതെങ്കിലും മനുഷ്യനിർമ്മിത ജലാശയങ്ങൾ എന്നിവയിലും കൊതുക് പ്രജനനം നടത്തുന്നു.
