ദല്‍ഹിയില്‍ ഭൂചലനം; ഉത്തരേന്ത്യയിൽ പല സ്ഥലങ്ങളിലും പ്രകമ്പനം
റിക്ടര്‍ സ്‌കെയിലില്‍ 6.6 തീവ്രത രേഖപ്പെടുത്തി.
ഇന്ത്യയിൽ ഡല്‍ഹിയിലും പരിസര പ്രദേശങ്ങളിലും ഭൂചലനം അനുഭവപ്പെട്ടു. രാത്രി 10.25 നാണ് ഭൂകമ്പമുണ്ടായത്. ഉത്തരേന്ത്യയില്‍ പല സ്ഥലങ്ങളിലും പ്രകമ്പനം അനുഭവപ്പെട്ടു. ഭൂചലനം ഏതാനും സെക്കന്‍ഡുകള്‍ നീണ്ടുനിന്നുവെന്നും ശക്തമായ ഭൂകമ്പമായിരുന്നുവെന്നും ദല്‍ഹി നിവാസികളെ ഉദ്ധരിച്ചുള്ള റിപ്പോര്‍ട്ടുകളില്‍ പറയുന്നു. ദല്‍ഹിയില്‍ ആളുകള്‍ വീടുകളില്‍നിന്ന് ഇറങ്ങിയോടി. വീടുകളിലേക്ക് മടങ്ങാതെ ആളുകള്‍ സുരക്ഷിത സ്ഥലങ്ങളില്‍ കഴിയുകയാണ്.
പാക്കിസ്ഥാനിലും ശക്തമായ ഭൂചലനമുണ്ടായതായി റിപ്പോര്‍ട്ടുകളില്‍ പറയുന്നു. പാക്കിസ്ഥാനില്‍ മിക്ക നഗരങ്ങളിലും 30 സെക്കന്‍ഡ് നീണ്ടുനിന്ന് ചലനം അനുഭവപ്പെട്ടു. വീടുകളില്‍നിന്ന് ഇറങ്ങിയോടിയ ജനങ്ങള്‍ റോഡുകളില്‍ ഖുര്‍ആന്‍ പാരായണം ചെയ്തു കഴിയുകയാണെന്ന് റാവല്‍പിണ്ടിയില്‍നിന്ന് എ.എഫ്.പി ലേഖകന്‍ റിപ്പോര്‍ട്ട് ചെയ്തു. ഇസ്ലാമാബാദ്, ലാഹോര്‍ തുടങ്ങി രാജ്യത്തിന്റെ പല ഭാഗത്തും ഭൂകമ്പം അനുഭവപ്പെട്ടു.
ഭൂചലനത്തിന്റെ പ്രഭവ കേന്ദ്രം അഫ്ഗാനിസ്താനിലെ ജുറുമാണെന്നാണ് പ്രാഥമിക നിഗമനം. ഹരിയാന, പഞ്ചാബ്, രാജസ്ഥാൻ, ജമ്മു-കശ്മീർ എന്നിവിടങ്ങളിലും രാത്രി 10.20ന് ഭൂമികുലുക്കം അനുഭവപ്പെട്ടു. മിനിറ്റുകൾ നീണ്ടുനിന്ന ഭൂചലനത്തിൽ ആളപായം റിപ്പോർട്ട് ചെയ്തിട്ടില്ല.
അഫ്ഗാനിസ്താന്റെ അതിര്‍ത്തി പ്രദേശമാണ് ജുറും. പ്രഭവ കേന്ദ്രത്തില്‍ നിന്ന് അധികം അകലെയല്ലാത്ത ഇന്ത്യയിലെയും പാകിസ്താനിലെയും മേഖലകളില്‍ ഭൂചലനം അനുഭവപ്പെടുകയായിരുന്നു.
നിലവില്‍ ആശങ്കപ്പെടേണ്ട സാഹചര്യമില്ലെന്നാണ് റിപ്പോര്‍ട്ട്. തുര്‍ക്ക്‌മെനിസ്ഥാന്‍, കസാഖ്‌സ്താന്‍, പാകിസ്താന്‍, താജിക്കിസ്താന്‍, ഉസ്‌ബെക്കിസ്ഥാന്‍, ചൈന, കിര്‍ഗിസ്ഥാന്‍ എന്നിവിടങ്ങളിലാണ് ഭൂചലനം അനുഭവപ്പെട്ടതെന്നാണ് പ്രാഥമിക റിപ്പോര്‍ട്ട്.
